En sellere Zeit hat de römische Kaiser Augustus e Volkszählung für sei ganz, riesigs Reich befohle.
So e Volkszählung hat’s vorher noch nie gewe ghet. Worom a? Awer de Kaiser hat halt möglichst viel iwer sei ganze Unnertane wisse welle. Do isch dann e arg große Datemenge zammekomme. Jeder Algorithmus deed sich heitzutag dodriwwer freie.
D’Leit hen sich dort melde miese, wo ihre Vorfahre herkomme sen. De Josef aus Nazareth hat deszweg mit seiner Verlobte Maria uff Betlehem gmießt. Dort war de Könich David gebore. Des war en Vorfahre vom Josef.
Alterle, war des ostrengend. Des isch iwer hunnert Kilometer zu Fuß durch e gebirgiche Landschaft gange. Und d’Maria war hochschwanger.
Wenigstens ware die zwei schon in Betlehem, wo d’Wehe so richtich losgange sen. D’Maria hat e Biewle kriegt. Irgendwie hen se Windle organisiert un den Kerle draneigwickelt. Nor hen sie en en e Futterkripp neigelgt. E annere Möglichkeit hat’s net gewe.
En sellere Nacht hen e paat Hirte drauße uff em Feld Nachtwach gschowe. Uff oimol, wo se an nix bsonners denkt hen, isch doch tatsächlich en Engel vom Herrgott bei ene gwe. `S war brutal hell. Sie hen richtich Angst kriegt. Awer de Engel hat se beruhicht: „Dir braucher koi Angst ho. Ganz em Gegeteil. Dir könnet eich freie. Grad vorhin isch nämlich drin em Städtle de Retter gebore. Gucket selwer. Uff oimol war en ganze Chor mit lauter Engel um se rum. Die hen gsunge vom Friede, noch schöner wie em Weihnachtsoratorium.
„Leit, des miese mer gseh ho“, hen se zuenanner gsagt. Ab isch’s gange zum Gucke. Un tatsächlich, do ware se, d’Maria, de Josef un des Bobbele. Do hen se dann allene Leit verzehlt, was d’se erlebt hen. Un wem sie’s verzehlt hen, die hen grad Bauklötzle gstaunt.
Awer d’Maria hat sich jedes Wort gmekt un hat net bloß en ihrem Kopf, sondern noch viel meh en ihrem Herz dodriwwer nochdenkt, was des alles bedeit für des Kind un für sie als Mutter un vielleicht sogar für die ganz Welt. (23.12.2025)
Autor: Theo Leonhard